ក្រុមសមាជិកព្រឹទ្ធសភាប្រចាំភូមិភាគទី៦ ចុះជួបសំណេះសំណាលជាមួយ ក្រុមប្រឹក្សាឃុំក្នុងស្រុកស្វាយជ្រំ ខេត្តស្វាយរៀង
នាព្រឹកថ្ងៃទី១៨ ខែកុម្ភៈ ឆ្នាំ២០២១ ឯកឧត្តម ម៉ែន ស៊ីផាន់ អនុប្រធានគណៈកម្មការទី៩ព្រឹទ្ធសភា និងឯកឧត្តម គឹម ធា លេខាធិការគណៈកម្មការទី៦ព្រឹទ្ធសភា តំណាងឱ្យសមាជិកក្រុមសមាជិកព្រឹទ្ធសភាប្រចាំភូមិភាគទី៦ បានអញ្ជើញចុះជួបសំណេះសំណាលជាមួយនឹងសមាជិក សមាជិកាក្រុមប្រឹក្សាឃុំចំនួន៤ រួមមាន៖ ឃុំស្វាយយា ឃុំស្វាយអង្គ ឃុំអង្គតាសូ និងឃុំគោកព្រីង ព្រមទាំងស្មៀនឃុំ និងនាយប៉ុស្តិ៍រដ្ឋបាលឃុំ ស្រុក នៅសាលាឃុំស្វាយយា ស្រុកស្វាយជ្រំ ខេត្តស្វាយរៀង។
ការចុះសំណេះសំណាលនាពេលនេះ គឺដើម្បីផ្សព្វផ្សាយសមិទ្ធផលសំខាន់ៗរបស់ព្រឹទ្ធសភា តួនាទីភារកិច្ចរបស់សមាជិកព្រឹទ្ធសភាប្រចាំភូមិភាគ ផ្សព្វផ្សាយវិធាន ការណ៍ការពារទប់ស្កាត់វីរុសកូវីដ-១៩ និងក្តាប់នូវស្ថាន ការណ៍ជាក់ស្តែង ពិនិត្យតាមដានយន្តការនៃការអនុវត្តកម្មវិធីនយោបាយភូមិ ឃុំសង្កាត់មានសុវត្ថិភាព និងឈ្វេងយល់អំពីបញ្ហាប្រឈមនានារបស់ឃុំ ស្រុក ដែលបាននិងកំពុងជួបប្រទះ និងសំណូមពរផ្សេងៗរបស់ប្រជាពលរដ្ឋ។
ក្នុងឱកាសនោះដែរ ក្រុមសមាជិកព្រឹទ្ធសភាប្រចាំភូមិភាគទី៦ ក៏បានផ្តល់នូវឯកសារមួយចំនួន និងថវិកាជូនសាលាឃុំទាំង៤ ដោយក្នុងមួយឃុំៗ ទទួលបានថវិកាចំនួន៥០០.០០០៛ (ប្រាំរយពាន់រៀល)៕
